شرح طريقة التسجيل للترشيح الوزاري للأطباء 2023
المقال ده هيكون طويل شوية عشان هنشرح طريقة التسجيل خطوة بخطوة في الترشيح الوزاري للعام الحالي 2023
- الشروط العامة و معلومات عن الترشيح : 1-10
- الخطوة الاولي التقديم الالكتروني : 11-25
- الخطوة الثانية التقديم الورقي : 26-27
- ازاي تملأ التعهدات و الاستمارات : 28-35
- ملاحظات : 36-48
- تظلمات نيابات سبتمبر 2022 و النيابات الاستثنائية 2023 : 38-39
- لو انت محافظة تامين شامل : 48-56
- الدكتوراة : 57-60
- مواعيد فتح الجامعات للتسجيل :61
بسم الله نبدأ
1- الترشيح الوزاري يعني ان الوزارة موافقة تديك اذن انك تسجل دراسات عليا (دبلوم او ماجستير او دكتوراة) في الجامعة لكن مش شرط الجامعة تقبل ، كل جامعة ليه شروطها.
2- اي طبيب يعمل في وزارة الصحة مينفعش يسجل دراسات عليا الا لما ياخد اذن من الوزارة اللي هو لسه قايلين اسمه الترشيح الوزاري
دراسات عليا دبلوم - ماجستير - و حتي الدكتوراة لازم يقدموا في الترشيح الوزاري
ملحوظة : لو انت شغال في محافظة تأمين شامل شوف اخر البوست رقم 48 لانك مش هتقدم في الترشيح الوزاري ده
مين اللي ليه حق يقدم
3- بالنسبة للماجستير او الدبلوم :
- اللي جالهم نيابات:
اي طبيب جاله نيابة سواء عادية او استثنائية ؛ ملحة او غير ملحة ؛ صحة او تعليمي ، المهم انه جاله نيابة في وزارة الصحة ؛ و مش شرط يكون استلمها و لا شرط يكون قضي فيها فترة معينة المهم جاله نيابة
- تنظيم الاسرة :
بيعمل زي تاني بند كده بيتوزع علي مستشفي لمدة سنة و بعد السنة ان شاء الله بيقدم في الترشيح بتاع السنة الجاية علي الجامعة مباشر
4- بالنسبة للدكتوراة :
- اللي شغالين في المستشفيات (العلاجي) :
الترشيح ينفع بعد الحصول علي الماجستير و مش شرط يكون اترقي
- اللي شغالين في الرعاية الاساسية او اي قطاع تاني:
الترشيح بعد سنة من الحصول علي الماجستير
بالنسبة لتفاصيل الترشيح شوف رقم 57 فيها كل تفاصيل ترشيح الدكتوراة
5- لازم تكون علي قوة العمل مينفعش تقدم و انت في اجازة الا اجازة وضع
لو انت في اجازة دلوقتي يبقي لازم تقطعها علشان تقدم
بالنسبة للمجند هيقدم عادي و ممكن اي حد يروح مكانه مش شرط هو و يكون معاه صورة الكارنية و هو بيودي الورق المديرية
6- الترشيح الوزاري بيفتح في شهر ابريل او مايو فقط كل سنة
و ده ملوش علاقة بالجامعة بتفتح امتي ؛ ايا كان الجامعة بتفتح امتي انت هتقدم في الترشيح في الشهر ده بس و لما الجامعة تفتح هتقوم الوزارة تبعت الورق للجامعة
و سواء انت تكليف مركزي او نائي كله بيقدم في ابريل او مايو
الفرق بس انه لو انت تكليف مركزي ملكش تقدم غير في ابريل او مايو بس
اما المكلفين علي المناطق النائية او اللي جالهم نيابات استثنائية بيبقي ليهم استثناء انهم يقدموا في اي وقت في السنة بشرط الجامعة تكون فاتحة
فيه شوية شروط تانية ضافوها السنة اللي فاتت بعد صدور قانون البعثات الجديد :
7- ان يكون غير مقيد حاليا في اي دراسة سواء دبلوم - ماجستير - دكتوراة - زمالة - بورد و هتمضي اقرار بكده ضمن التعهدات تحت
8- ألا يكون قد سبق ايفاده في بعثة للغرض ذاته
ألا يكون قد عاد من ايفاد سابق
ألا يكون قد سبق الغاء قيده لاسباب ناشئة عن عن تقصيره او عدم قدرته علي التحصيل العلمي او لسوء السلوك
الا يكون في منحة مقدمة للدولة او بعثة او اجازة دراسية لنفس الغرض
ملخص الكلام ده انه ميكونش اترشح قبل كده لنفس التخصص
9- الا يزيد السن عن 50 سنة وقت التقدم
10- وضافوا شرط كده ان لازم تقضي مدة مماثلة للمدة التي قضاها في البعثة او الاجازة طبقا لقانون البعثات الجديد
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
خطوات التقديم بالتفصيل
التقديم هيبدأ يوم 10 ابريل ان شاء الله و لمدة شهر
بكرر تاني مش هتعرف تقدم علي الموقع الا يوم 10 ابريل ، انما دلوقتي الموقع مش متاح التسجيل عليه
التقديم خطوتين و لازم تعمل الخطوتين وقت ما الترشيح فاتح
تقديم الكتروني علي موقع المنح و البعثات ثم تقديم ورقي في مديرية التكليف
مفيش مشواير للوزارة خالص كل حاجة هتخلص من (المديرية - ادارة التدريب)
- التقديم الالكتروني :
خد بالك من كام نقطة كده
11- الموقع لسه مش متاح التسجيل عليه الا يوم 10 ابريل ان شاء الله ، لو دخلت دلوقتي مش هتعرف تسجل ها مش هتعرف تسجل لان ايقونة التسجيل اصلا مش موجودة
12- لازم تدخل من كمبيوتر او لاب لان الموبايل هيقرفك و مش هتعرف تسجل
13- فيه ورق مطلوب رفعه علي الموقع شهادة التخرج و التقديرات و تعهدات تانية حاول قبل ما تدخل تسجل يبقي معاك شهادة التخرج و شهادة التقديرات ، تسحبهم سكانر او تصور صورة كويسة بالموبايل بس عادي يعني مع السنة دي حدثوا الموقع و بقي ممكن تسجل و تطبع الورقة علشان تمشي دنيتك و بعد كده تبقي ترفع باقي الشهادات و التعهدات في اي وقت
و حاول لما تيجي ترفعهم تبقي تقلل جودتهم شوية لان لو الجودة عالية الموقع مش هيرضي يسيف ، فحاول تقلل جودة الصور شوية ممكن مثلا تبعتها لحد واتساب و تنزلها تاني هتلاقي حجمها قل
بس خد بالك انه السنة دي ضافوا تحديث كده علي الموقع انه بترفع حاجات تانية غير الشهادتين دول لكن الموقع عادي هيحفظ اول مرة بدونهم ، فانت بقي هتسجل اول مرة و ترفع الشهادتين و بعدين تطبع الاستمارة و تروح تكمل الخطوة الورقي و بعدين و انت بتعمل التعهدات و باقي الورق ابقي صوره بالموبايل و ارجع ارفعه تاني علي الموقع و الموقع بيقبل التعديل عادي
14- الموقع فيه قابلية تعديل البيانات في اي وقت طول ما الترشيح فاتح ، علشان لو غلطت في حاجة ممكن تخش تعدلها تاني و مع كل تعديل و بتدوس حفظ بيجيب لك تحت خالص "تم تحديث البيانات بتاريخ كذا" و طبعا بتروح تطبع الاستمارة تاني و بتلاقيها متحدثة برضو و مكتوب تاريخ اخر تعديل فوق علي الشمال و تحت خالص
15- لو بيان الدرجات اكتر من صفحة زي بتاع الجامعات الخاصة ممكن تجمعهم مع بعض في صورة واحدة او ترفع الصفحة اللي فيها تقدير المادة اللي انت هتتخصص فيها
16- الموقع احيانا بيبقي فيه مشاكل في الـ (security) هتلاقي البروزر بيطلع لك تنبيه انك متدخلش علي الموقع او لو عندك انتي فيرس برضو ممكن يبعتلك تنبيه
الفكرة انك هتدور علي كلمة (proceed or I wish to continue)
لو داخل من جوجل كروم هتلاقي advanced -- proceed
و لو الانتي فيرس قرفك ابقي عطله شوية علي ما تخلص تسجيل
و لو انت مش فاهم في القصص دي خلاص ابقي ادخل علي اللينك الاول اللي في رقم 21
17- الموقع ساعات بيبقي عليه ضغط حاول في وقت مش عليه ضغط زي بالليل خالص او الفجر
18- بعد ما خلصت تسجيل و بتدوس حفظ ممكن تلاقيه جابلك (ERROR) ده ممكن بسبب حاجتين
19- ان حجم الصور اللي رفعتها عالي فحاول تقلل جودة الصور شوية ممكن مثلا تبعتها لحد واتساب و تنزلها تاني هتلاقي حجمها قل و تخش تعدلها من علي الموقع تختار DELETE و ترفع الصور تاني
20- او السبب الاشهر انك لما جيت تدخل تاريخ الميلاد او التخرج متكتبوش بايدك لا اختاره من الكاليندر هااااا متكتبوش مانوال اختاره من الكاليندر اللي قدامك
هتضغط علي "تسجيل دخول" اعلي شمال الصفحة و بعدين تضغط علي "ليس لدي حساب" و تعمل حساب باستخدام الرقم القومي
خد بالك و انت بتسجل هتكتب باسورد ابقي حاول تحفظه كويس علشان هتستخدمه بعد كده في الدخول
طبعا كلمة "ليس لدي حساب" دي مش موجودة في الموقع دلوقتي لان التسجيل لسه هيفتح يوم 10 ابريل ان شاء الله
22- و بعدين تملأ البيانات كالاتي :
- القطاع :
الرعاية العلاجية و العاجلة : لو انت جالك نيابة او علي قوة مستشفيات يعني
- الادارة :
الادارة العامة للمستشفيات : لو انت نيابة او علي قوة مستشفيات يعني
ولو عايز تبقي دقيق
لو انت رمد هتختار الادارة العامة لطب العيون
لو انت نفسية هتختار الادارة العامة للصحة النفسية
لو انت صدر هتختار الادارة العامة للامراض الصدرية
لو انت اشعة هتختار الادارة العامة للاشعة
لو انت بنك دم هتختار الادارة العامة لشئون الدم و مشتقاته
ملحوظة :
لو انت تنظيم اسرة هتختار من خانة القطاع : قطاع السكان و تنظيم الاسرة ، و من خانة الادارة : الادارة المركزية لتنظيم الاسرة
لو انت كلينكال باثولوجي هتختار من خانة القطاع : الادارة المركزية للمعامل المركزية ، و من خانة الادارة : المعامل المركزية
23- باقي البيانات :
- الكلية : طب بشري
- التخصص : هتختار تخصص الدبلوم او الماستر او الدكتوراة اللي هتقدم عليه
هتلاقي صورة في البوست فيها جدول كده كل تخصص و هيقدم ترشيح ايه في تخصصات الماستر كويسة اوي و ملخصة الدنيا شوفها كويس علشان دي اللي هتقدم علي اساسها و شوف تخصصك متاح ليه يقدم ايه خصوصا اسبيشيالات الباطنة و الجراحة
- بالمناسبة خلاص خلوا تخصص عناية قلب هياخد ترشيح قلب بس طبعا لازم تتأكد من العلاجي انك هتعرف ترقي بيه في الوزارة و لا لا لان دي اول مرة تحصل
- لو انت تخصص كلي : معظم الجامعات ماستر باطنة يبقي لو هتقدم ماستر باطنة تختار باطنة اما لو هتقدم في الجامعتين تلاتة اللي فيهم كلي منفصل يبقي هتختار كلي صناعي
- لو انت تخصص نفسية : معظم الجامعات الماستر بيبقي عصبية و نفسية يبقي هتختار عصبية و نفسية
انما لو هتقدم في جامعة فيها نفسية منفصل زي القصر يبقي تختار نفسية او طب نفسي
- لو انت تخصص جهاز هضمي : علي حسب الجامعة الدرجة بتاع الماستر اسمها ايه
لو جهاز هضمي هتختارها ، او مناطق حارة او امراض معدية علي حسب اسم الدرجة ايه عندهم
- تخصص النيابة للطب البشري : هتختار التخصص زي ما ظهر لك في نتيجة حركة النيابات
- الدراسة المرشح لها : هتختار دبلوم او ماستر او دكتوراة
- تاريخ الميلاد او التخرج متكتبوش بايدك لا اختاره من الكاليندر هااااا متكتبوش مانوال اختاره من الكاليندر اللي قدامك زي ما قلت فوق ، و بالنسبة لليوم اختار اي يوم كده كده هو هيحفظها بالشهر و السنة بس
- تاريخ التسجيل : هتلاقيه هو مختاره من نفسه
- المؤهل : بكالوريوس طب و جراحة
- الجامعة : لو جامعتك مش موجودة هتختار كلمة "جامعات اخري" و كده كده انت بتكتبها باستمارة الترشيح اللي بتملاها بايدك
- المجموع : هتكتب المجموع زي ما في الشهادة
بالنسبة للي مجموعهم GPA حاول تدور كده علي المجموع بالدرجات و لو مش موجود خلاص اكتب الـ GPA
- التقدير العام و تقدير المادة
- محافظة العمل : هتختار محافظة العمل الاصلية اللي درجتك المالية عليها و اللي ملفك الاصلي فيها و انت علي قوتها او اخليت منها للنيابة او للجيش
- دراسات سابقة : لو كنت خدت دبلوم او ماستر قبل كده و تقديرها و تاريخ الدراسة مش محددين يقصدوا انهي تاريخ التسجيل و لا الحصول
- الرغبات : هتختار 3 رغبات (بص في رقم 37)
24- بعدين هترفع علي الموقع كذا حاجة
السنة دي ضافوا تحديث كده علي الموقع انه بترفع حاجات تانية غير شهادة التخرج و التقديرات ، بس الموقع عادي هيحفظ اول مرة بدونهم ، فانت بقي هتسجل اول مرة و ترفع الشهادتين و بعدين تطبع الاستمارة و تروح تكمل الخطوة الورقي و بعدين و انت بتعمل التعهدات و باقي الورق ابقي صوره بالموبايل و ارجع ارفعه تاني علي الموقع و الموقع بيقبل التعديل عادي
الورق المطلوب رفعه:
- شهادة التخرج
- شهادة التقديرات
- بيان حالة : اللي هو بيان حالة وظيفية اللي هتعمله في الخطوة الورقي
- تعهد الكفيل : اللي هو تعهد الضامن
- تعهد دراسي : اللي هو تعهد عضو اجازة دراسية
- اقرار مصروفات : اللي هو الاقرار او التعهد الخاص بالمصروفات
- اقرار صحة بيانات : اللي هو اقرار انك مش مسجل في دراسة اخري
التعهدات دي هتلاقي شرحها تحت في رقم 28
خد بالك هتدوس browse و بعد كده تدوس تحميل الملف هااا لازم تدوس تحميل الملف
و في الاخر تضغط حفظ
بعد ما البيانات اتحفظت هتلاقي كلمة طباعة بالبرتقالي ظهرت لك جنب كلمة حفظ ، وممكن تدوس علي كلمة طباعة اللي فوق خالص
بعد كده تضغط علي الزرار الازرق و تختار
PDF
25- الملف اللي بيتطبع ده
- مش بيبقي فيه لا الصور و لا تقدير المادة ده عادي
- هتلاقي فوق مكتوب تاريخ التسجيل ده ترايخ اول تسجيل ليك ، و هتلاقي تاريخ اخر تعديل ده تاريخ اخر مرة عدلت فيها
- هتلاقي تحت كلمة تأكيد البيان : تم التأكيد
بعد كده بقي تاخد الورقة دي و تقدمها مع باقي الورق في المديرية و انت بتقدم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
26 - التقديم في مديرية التكليف :
مديرية تكليفك سواء نائي او مركزي اللي درجتك المالية عليها و اللي ملفك الاصلي فيها و انت علي قوتها او اخليت منها للنيابة او الجيش
و بالتالي لو انت تكليف نائي و اخليت للنيابة فانت لما تخلص ورق الترشيح هتروح للمحافظة النائي هااا
هتروح و معاك الاتي :
- الورقة اللي انت طبعتها من الموقع في الخطوة اللي فاتت
- شهادة التخرج (اصل او صورة طبق الاصل مختومة) دي ممكن تلاقيها في ملفك في المديرية او الادارة علي حسب ملفك فين ممكن تعملها من عندهم طبق الاصل مش هينفع تسحبها من عندهم انت مجرد هتعمل صورة طبق الاصل
- شهادة التقديرات او بيان درجات ( اصل او صورة طبق الاصل مختومة) مش هتلاقيها في الملف لازم تبقي مطلع واحدة و ممكن تحاول تعملها طبق الاصل من المديرية او الوحدة و لو منفعش ممكن تعملها من الجامعة صورة طبق الاصل ، و خد بالك هتحتاج واحدة للجامعة لما تيجي تقدم فيها ماستر برضو
صورة طبق الاصل يعني تصور الشهادة و تختم علي الصورة بختم النسر
- لو دكتوراة يبقي شهادة الماجستير مش شهادة مؤقتة و لا افادة لازم الشهادة نفسها
- لو مجند يبقي معاك اثبات تجنيد او كارنية الجيش
- صورة بطاقة
- طابع دمغة ب 4 جنية (من البريد)
- هتطبع سبع ورقات من علي اللينك ده
و هشرحلك تملاهم ازاي في رقم 28
- بعض المديريات بيطلبلوا حاجة اسمها موافقة جهة العمل
ده طلب بتقدمه في المستشفي اللي انت مستلم فيها نيابة
او الادارة لو انت مستلمتش نيابة
صيغته بسيطة خالص
السيد مدير.....
تحية طيبة و بعد ؛
ارجو من سيادتكم التكرم بالموافقة علي تقدمي للترشيح الوزاري لدرجة الدبلوم /الماجستير/الدكتوراة تخصص ... للعام الدراسي 2023/2024
ولسيادتكم جزيل الشكر
مقدمه لسيادتكم
الاسم
الوظيفة
و يتمضي و يتختم
27- الخطوات بقي
- هي الخطوات عموما شبه بعض لكن فيه بعض الاختلافات البسيطة من محافظة للتانية ، انت هتتنقل ما بين شئون العاملين و ادارة التدريب
- اول حاجة هتطلع علي شئون العاملين علي حسب ملفك فين (المديرية او الادارة) غالبا هيبقي في المديرية لكن محافظة زي القاهرة ملفك بيبقي في المنطقة فبتبدأ من المنطقة ، علشان تعرف ملفك فين افتكر لما كنت بتطلع بيان حالة وظيفية كنت بتطلعه من المديرية و لا المنطقة
و انت عند شئون العاملين طبعا انت هتكون مليت النص الاول من ورقة استمارة الترشيح زي ما هشرح في رقم 29 لكن عند شئون العاملين هتعمل كذا حاجة :
- هتخليهم في شئون العاملين يملوا النص التاني من الاستمارة
- و انت هناك خد منهم بيان حالة وظيفية و متنساش تصوره بالموبايل باي تطبيق صورة كويسة علشان هترفعه علي الموقع
- خد بالك فيه بعض المحافظات زي الدقهلية يبقي لازم تتأكد ان التقارير السرية بتاعتك موجودة عندهم علشان هيكتبوها في الاستمارة
- بعدين تطلع علي ادارة التدريب هيكملوا بقية استمارة الترشيح و بعدين ترجع تاني لشئون العاملين يختموا استمارة الترشيح
- قبل ما تمشي من عند شئون العاملين هتحاول انك تعمل صورة طبق الاصل من الورق كله ، كلمة صورة طبق الاصل انك تبقي مصور الورق و تختم علي الصور بختم النسر ، الاستمارة و التعهدات و الإقرارات بعد ما تخلص كل الامضاءات و الاختام هتصورها خد بالك صورها بعد ما تخلصها خالص هااا، ممكن الموظف يقولك ده تعهد اختمه ليه قوله انت خد الاصل عندك في ملفي اللي عند شئون العاملين يبقي لازم اختم طبق الاصل علشان اديه لادارة التدريب
مفروض بقي اصول الورق ده تتحط في ملفك و بعدها بقي تاخد الصور طبق الاصل المختومة توديها لادارة التدريب ، و انت رايح ادارة التدريب ابقي اتأكد انها مختومة ها
متنساش تصور التعهدات و الاقرارات بالموبايل بعد ما ختمتها بأي تطبيق صورة كويسة علشان هترفعهم علي الموقع
- يبقي انت هتتنقل ما بين شئون العاملين و ادارة التدريب بالمديرية
- ادارة التدريب احيانا بتبقي بعيدة عن المديرية شوية زي الغربية و الجيزة مثلا في مستشفي ام المصريين
- مديرية القاهرة طريقة التقديم فيها انك بتبدأ من المنطقة و هم يبعتوا للمديرية لان كل منطقة فيها شئون عاملين و ادارة تدريب و انت بتخلص الورق كله من المنطقة و هم بيبعتوا لادارة التدريب بالمديرية
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
28- بالنسبة لورق الترشيح اللي مفروض تملاه
هم سبع ورقات ده اللينك بتاعهم هتنزلهم و تطبعهم
هتملاهم كلهم ما عدا الورقة التالتة او الرابعة يا ما تختار دي او دي ، يا اما رقم 31 او 32
بالنسبة لاخر اقرار بتاع التفرغ هم مش منزلينه في الملف بتاع الوزارة السنة دي بس انا جبته من بتاع السنة اللي فاتت علشان لو نفترض موظف اتفزلك و طلبه ، لكن لو محدش طلبه متعملوش
ملحوظة : بعد ما تخلص اي ورقة منهم و تختمها ابقي صورها كذا صورة بعد ما ختمتها هااا بعد الختتم علشان تبقي تعلمها طبق الاصل زي ما شرحت فوق
و متنساش تصور التعهدات و الاقرارات بعد ما ختمتها بالموبايل بأي تطبيق صورة كويسة علشان هترفعهم علي الموقع هاااام هاا
اللي هيترفع علي الموقع الاتي :
- بيان حالة : اللي هو بيان حالة وظيفية اللي عملته في الخطوة الورقي
- تعهد الكفيل : اللي هو تعهد الضامن
- تعهد دراسي : اللي هو تعهد عضو اجازة دراسية
- اقرار مصروفات : اللي هو الاقرار او التعهد الخاص بالمصروفات
- اقرار صحة بيانات : اللي هو اقرار انك مش مسجل في دراسة اخري
الي جانب شهادة التخرج و التقديرات
خد بالك هتدوس browse و بعد كده تدوس تحميل الملف هااا لازم تدوس تحميل الملف
29- استمارة ترشيح :
اول ورقة في الملف المرفوع هتلاقي ثلاثة مستطيلات
***اول مستطيل بعنوان " البيانات الشخصية " هتملاه
الوظيفة الحالية : لو انت لسه مش هتستلم النيابة دلوقتي هتكتب طبيب بشري بوحدة كذا او مركز كذا ، اما لو بتخلي لاستلام النيابة هتكتب طبيب مقيم كذا مستشفي كذا
محافظة العمل الاصلي : محافظة التكليف اللي انت فيها
الادارة الصحية الاساسية : الادارة اللي انت فيها
جهة العمل المنتدب اليها : المستشفي اللي جالك فيها نيابة ، بس لو لسه مش هتستلم نيابة دلوقتي ممكن تسيبها فاضية
محافظة الانتداب : المحافظة اللي فيها نيابتك ، بس لو لسه مش هتستلم نيابة دلوقتي ممكن تسيبها فاضية
المؤهلات : بكالوريوس الطب والجراحة
تاريخ الحصول عليها : اسم دفعة تخرجك ، الدور بتاع البكالوريوس مثلا نوفمبر 2020
مجموع الطالب : مجموعك زي ما في شهادة التخرج بالدرجات
المجموع الكلي : النهاية العظمي لكليتك زي ما في شهادة التخرج زي مثلا 6350
التقدير العام - تقدير المادة بتاع التخصص اللي هتقدم عليها
هل سبق القيد : سيبها فاضية طالما مقدمتش قبل كده
***ثاني مستطيل بعنوان " الدراسة المطلوبة " هتملاه كالاتي
- نوع الدراسة = ماستر و لا دبلوم و و لا دكتوراة و تختار التخصص
- القطاع و الادارة الفنية : القطاع العلاجي - الادارة العامة للمستشفيات
او زي ما شرحت فوق في رقم 22
- الجامعة هتكتب الـ الجامعة اللي انت عايزها في الـ 3 خانات
- توقيع طالب الدراسات العليا اللي هو انت
***ثالث مستطيل بعنوان " بيانات تملأ بمعرفة شئون العاملين وادارة التدريب "
هتخلي موظفين شئون العاملين و ادارة التدريب يخلصوه
- لو انت لسه مش هتستلم النيابة دلوقتي هيتم ملء السطر الاول اللي هو خاص بالتكليف ، تاريخ التكليف : تاريخ استلام التكليف
اما لو انت بتخلي لاستلام النيابة هيتم ملء السطرين التانيين
- تاريخ حركة النيابة : حركة مارس او سبتمبر سنة كذا
- تاريخ استلام النيابة : تكتب التاريخ اللي بتخلي فيه دلوقتي
- تقارير الكفاية اللي هي التقارير السرية مش بتأثر علي التقديم ، خليهم يكتبوها عادي ، لو لسه تعيين جديد خليهم يكتبوا تعيين جديد
- الاجازات و الجزاءات : علي حسب انت خدت و لا لا
و متنساش تحط الدمغة
في الاخر هيمضيها مدير شئون العاملين ف المديرية
و بعدين موظف في ادارة التدريب في المديرية و مدير ادارة التدريب
و بعدين تمضيها من وكيل الوزارة (مدير المديرية) و تختمها ختم النسر
30- اقرار :
ثاني ورقة في الملف المرفوع
ده تعهد بتملاه انت قدام الموظف في ادارة التدريب و تمضي في اخره
انك غير مقيد باي دراسة حاليا
و انك لم يتم ترشيحك قبل كده لنفس التخصص
و انك مش هتسجل اي دراسة تانية
و للوزارة الحق في الغاء الترشيح في حالة مخالفة ذلك
31 - اقرار بعدم المطالبة بمصروفات :
ثالث ورقة في الملف المرفوع
و ده معناه انك مش هتطالب الوزارة برد المصروفات اللي انت دفعتها للماستر
و مش قايلين اذا كان ده هيعفيك من انك هتقضي مدة مماثلة للدراسة او لا
هتملاه كالاتي :
(الدراسة) = دبلوم او ماجستير
(مكان الدراسة) = الجامعة اللي انت مقدم عليها اول رغبة
(العام الدراسي) = 2024 / 2023
(الوظيفة الحالية) = لو انت لسه مش هتستلم النيابة دلوقتي هتكتب طبيب بشري بوحدة كذا او مركز كذا ، اما لو بتخلي لاستلام النيابة هتكتب طبيب مقيم كذا مستشفي كذا
(الادارة الفنية) = الادارة العامة للمستشفيات او زي ما شرحت في رقم 22
(جهة العمل) = المديرية الاصلية بتاعتك اللي انت بتقدم فيها الترشيح
32 - تعهد سداد مصروفات :
رابع ورقة في الملف المرفوع
و ده تعهد معناه ان الوزارة هتتحمل مصروفات الجامعة مقابل انك تشتغل مدة مماثلة لمدة الدراسة بعد ما تخلص ماستر
و لو طلبت تسافر قبل ما تقضي المدة المقررة هترد كل المصروفات اللي اتدفعت لك و كمان لو كنت اخذت تفرغ بمرتب هترده برضو
لكن علي ارض الواقع حتي الان الوزارة متحملتش المصروفات
هتملاه كالاتي :
(الدراسة) دبلوم او ماجستير
(مكان الدراسة) = الجامعة اللي انت مقدم عليها اول رغبة
(العام الدراسي) = 2024 / 2023
(الوظيفة الحالية) = لو انت لسه مش هتستلم النيابة دلوقتي هتكتب طبيب بشري بوحدة كذا او مركز كذا ، اما لو بتخلي لاستلام النيابة هتكتب طبيب مقيم كذا مستشفي كذا
(الادارة الفنية) = الادارة العامة للمستشفيات او زي ما شرحت في رقم 22
(جهة العمل) = المديرية الاصلية بتاعتك اللي انت بتقدم فيها الترشيح
و زي ما قلت فوق بتختار ده او ده 31 او 32
33- تعهد الضامن :
خامس ورقة في الملف المرفوع
و ده معناه زي شخص بيضمنك عند الدولة اثناء الدراسة اللي هي بعثة دراسية
و ممكن يكون اي موظف حكومي سواء والدك او قريبك او جارك او زميلك ....
و السنة دي عملوا تعهد جديد غير اللي كان موجود قبل كده طبقا لقانون البعثات الجديد ، هم ناقلينه من التعهد بتاع وزارة التعليم العالي
هتخلي الضامن بتاعك يملي اول كام سطر من اول كلمة " اقر انا الموقع ادناه" لغاية كلمة "بريد الكتروني"
بعد كده انت الطبيب بقي هتملي من اول كلمة "اكفل السيد/السيدة"
و في الاخر تحت خالص هتلاقي كلمة" الضامن/الكفيل /الملتزم"
بعد كده تحت خالص هتلاقي شرطة بالعرض مكتوب تحتها بيانات تملأ بمعرفة الجهة الموفدة ، الكلام اللي تحتها ده الموظف في ادارة التدريب هو اللي هيملاه و طبعا هتلاقي مطلوب الرقم القومي للضامن فلذلك احتياطي انت هتبقي واخد صورة بطاقة الضامن معاك علشان لو الموظف طلبها
المصدق غالبا يقصدوا بيه الموظف اللي هناك اللي هيملأ الجزء ده
بما ان الاقرار بشكله الجديد ده لسه اول مرة يتعمل السنة دي فبالنسبة للموظف ده و الختم لسه مش عارفين هيبقي موظف ادارة التدريب و لا شئون العاملين بس غالبا بتاع ادارة التدريب
34 - تعهد دراسي عضو :
سادس ورقة في الملف المرفوع
ده تعهد بتملاه انت قدام الموظف في ادارة التدريب و تمضي في اخره
هتملأ البيانات كلها الاسم و الرقم القومي ..الخ و تمضي تحت في الاخر
بعد كده تحت خالص هتلاقي شرطة بالعرض مكتوب تحتها بيانات تملأ بمعرفة الجهة الموفدة ، الكلام اللي تحتها ده الموظف في ادارة التدريب هو اللي هيملاه
المصدق غالبا يقصدوا بيه الموظف اللي هناك اللي هيملأ الجزء ده
بما ان الاقرار بشكله الجديد ده لسه اول مرة يتعمل السنة دي فبالنسبة للموظف ده و الختم لسه مش عارفين هيبقي موظف ادارة التدريب و لا شئون العاملين بس غالبا بتاع ادارة التدريب
35- اقرار يفيد بعلم المرشح بتوقف التفرغات الدراسية بناءا علي قرار المجلس الاعلي للجامعات
ده اقرار جديد كانوا ضافوه السنة اللي فاتت هتلاقيه اخر ورقة في الملف المرفوع ، معناه انك تمضي انك عارف ان اجازات التفرغ موقوفة
بس هم مش منزلينه في الملف بتاع الوزارة السنة دي ، لكن انا حطيت بتاع السنة اللي فاتت علشان لو نفترض موظف اتفزلك و طلبه ، لكن لو محدش طلبه متعملوش
هتلاقي مكتوب فيه
اقر انا /
بانني علي علم بان التفرغ معلق مؤقتا بسب جائحة كورونا و انه لا يوجد تفرغ للدراسة في الوقت الحالي
و هذا اقرار مني بذلك
المقر بما فيه
كده انت خلصت تقديم خلاص و هتستني نتيجة الترشيح اللي بتعلنها الوزارة في شهر 6 ان شاء الله
و بعدين الوزراة بتبعت الاسماء للجامعات لما الجامعة تفتح للتسجيل هتتابع انت مع الجامعة تشوف بيطلبوا تقدم عندهم و لا لاو بعد كده تكمل معاهم تشوف اتقبلت و لا لا
لو متقبلتش هتاخد جواب رفض و تقدم علي اي جامعة فاتحة ساعتها و مش شرط تكون من الجامعات اللي كنت كاتبها في الرغبات
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
شوية ملاحظات :
36 - بالنسبة للزمالة المصرية
مفروض انه خلاص هيبقي اسمها البورد المصري و احتمال تفتح قريب بس غالبا هتبقي بنفس القواعد يعني
و بالتالي الاحسن قدم دلوقتي في الترشيح الوزاري و اضمنه و لما يبقوا يفتح البورد المصري ممكن ساعتها تبقي تقدم و لو اتقبلت ابقي الغي الترشيح الوزاري
و خد بالك ان اللي بيلغي الترشيح الوزاري بيتحرم 3 سنين علي الاقل من التقديم للترشيح تاني و بالتالي متلغيش حاجة الا لما تضمن حاجة غيرها
37- و انت بتسجل الترشيح الوزاري هتكتب 3 رغبات ب 3 جامعات و ممكن تكتب جامعة مرتين و غالبا هيجيلك الرغبة الاولي و احتمال ضعيف يجيلك الرغبة التانية لو الرغبة الاولي مش متوافقة مع شروط الجامعة
و علي اساس كده الوزراة هتبعت ترشيحك للجامعة اللي انت اخترتها
و بعدين تستني لما الجامعة تفتح و الوزارة تبعت اسمك للجامعة و بعدين تستني بتاع شهرين علي ما تعرف انت اتقبلت في الجامعة او لا ؛ ساعتها هتكون معظم الجامعات قفلت لان مواعيدهم متقاربة تقريبا و بالتالي لو انت اترفضت هتضطر تستني كام شهر تاني لغاية ما اقرب جامعة مناسبة تفتح
فلازم تكون سائل عن الجامعات كويس و عارف بتفتح امتي و بتقبل تقديرات ايه ولو ليها سكور تكون عارف و فرصتك في القبول قد ايه
حاول تسأل زمايلك في التخصص اللي اكبر منك او حد من الدفعات الاكبر
الـ 3 جامعات اللي هتكتبهم مش مهم هيفتحوا امتي و حتي لو هيفتحوا مع بعض عادي برضو
بس يعني ابقي اكتب الجامعة اللي بتفتح مرة واحدة الاول زي بنها و الازهر قبل ما الجامعات اللي بتفتح مرتين ده في حالة انك عايزهم يعني مش اجبار خالص
و لو اترفضت من جامعة ممكن تقدم علي اي جامعة تانية فاتحة ساعتها و مش شرط تكون كتبتها في الرغبات بكرر تاني كتير علشان النقطة دي الناس مش فاهماها مش شرط تكون كتبتها في الرغبات
38- بالنسبة للتظلمات بتاع حركة نيابات سبتمبر 2022 احنا لسه في انتظار نتيجتها و ان شاء الله مش هتتاخر فالافضل استني لو هتغير تخصص في التظلمات استني لما نتيجتها تظهر و اعمل الترشيح علشان متعدش الورق ده كله تاني و لسه الترشيح قدامه شهر علي ما يقفل ، اما لو مش هتغير تخصص خلاص اعمله عادي دلوقتي مش مشكلة
39- بالنسبة للنيابات الاستثنائية اللي هي تبع الرعاية الحرجة و العاجلة برضو لسه نتيجتها مظهرتش ، بس ان شاء الله تظهر و لسه الرتشيح قدامه وقت ، فانت قدم في الترشيح عادي لما نتيجتها تظهر ، انا عارف انها ليها ترشيح استثنائي بس طالما الترشيح الاساسي فاتح قدم عادي و لو لا قد اترفضت هتاخد جواب رفض و تسجل تاني و مش هتحتاج الترشيح الاستثنائي
40- لو انت ناوي تعدل نيابة (تغير تخصص يعني) بسماح المجموع و لسه يعني مخلصتش اجراءته
يبقي تقدم الترشيح دلوقتي علي التخصص اللي انت فيه و لما تعدل النيابة ان شاء الله هتاخد قرار تعديل النيابة و توديه الوزارة و هيعدلوا لك الترشيح علي التخصص الجديد حتي لو بعد شهر خمسة
بس خد بالك لو ناوي تعمل كده يبقي تعدل النيابة و بعده تعدل الترشيح قبل ما الجامعة اللي قدمت عليها ما تقفل التقديم ليه لان لما الجامعة تقفل هتقوم الوزارة تبعت الترشيح للجامعة بالتخصص القديم و هتقعد تلف لفة علشان تعدله و هتتعطل كتير
41- لو انت كنت واخد نيابة و لغتها و بعدين خدت نيابة تخصص جديد ؛ هيبقي من حقك تقدم الترشيح عادي علي التخصص الجديد بس يبقي معاك قرار إلغاء النيابة القديمة و قرار النيابة الجديدة
42- لو انت كنت مقدم بترشيح وزاري قبل كده للجامعة و اترفضت ؛ يبقي من حقك تقدم عادي في الترشيح الجديد بس غالبا بيحتاجوا يبقي معاك جواب رفض من الجامعة
43- لو انت قدمت في ترشيح وزاري و اتقبلت في الجامعة و دفعت المصاريف و بقيت مقيد في الكلية يبقي مش هينفع تقدم تاني في الترشيح الوزاري و لو عايز تغير الجامعة يبقي تجيب موافقة الجامعتين و توديها الوزارة و تنقل
44- لو انت كنت قدمت في جامعة قبل الترشيح الجديد ما يفتح بس لسه نتيجة تقديمك في الجامعة مظهرتش زي اللي لسه جايلهم نيابة و قدموا ترشيح استثنائي ؛ استني لغاية قبل ما الترشيح الجديد يقفل بشوية
لو كانت نتيجة تقديمك في الجامعة ظهرت
لو اترفضت بص في رقم 42 = قدم في الترشيح الجديد
لو اتقبلت بص في رقم 43
اما لو الترشيح قرب يقفل و لسه النتيجة مظهرتش يبقي ممكن تقدم في الترشيح الجديد
و بعد ما الترشيح يقفل
لو اتقبلت في الجامعة ابقي روح ادارة التدريب بالمديرية و قولهم انك اتقبلت خلاص
لو اترفضت يبقي كمل زي ما انت في الترشيح الجديد
غالبا في الوزارة بيعدوها للجامعات اللي بتفتح في ابريل دي
45- لو حبيت تلغي الترشيح بعد ما قدمت يبقي هتتحرم 3 سنين علي الاقل من التقديم للترشيح الوزاري
46- لو انت مكلف علي منطقة نائية و معدلتش تكليف منها او انت نيابة استثنائية ، فانت ليك الحق تقدم في الترشيح الاساسي و لو فاتك التقديم ممكن تقدم في اي وقت طول السنة طالما الجامعة فاتحة و هيفضل ليك الحق في الترشيح الاستثنائي ده طالما انت لسه علي قوة المنطقة نائية
معني كلمة الاستثنائي انه فقط هو مجرد استثناء من التقيد بشهر ابريل لكن مفيش اي ميزة زيادة عن المكلفين مركزي و هي هي نفس الاجراءات تقريبا و مفيش اولوية في القبول في الجامعة و لا حاجة
ولو مستخدمتش الترشيح الوزاري الاستثنائي ده طول سنة النائي ؛ عادي هو مجرد اوبشن اضافي كان متاح ليك بس انت مستخدمتوش لكن مازال ليك الحق تقدم في ترشيح شهر خمسة
اما لو عملت تعديل تكليف و نفذته و اخليت من النائي و بقيت مركزي كده ملكش الحق غير في ترشيح شهر خمسة فقط
انما لو انت من اهل المحافظة النائية اصلا و ناوي تكمل فيها و مش هتعدل تكليف يبقي حتي لو فاتك ترشيح شهر خمسة هيبقي من حقك تقدم في اي وقت في السنة بشرط الجامعة تكون فاتحة ؛ بس برضو الافضل قدم في ترشيح شهر خمسة
47- كان فيه حاجة اسمها اجازة تفرغ و هي انك بتاخد اجازة تخلص فيها الرسالة و بتقبض فيها مرتب بس دي اتلغت من سنتين و رجعت دلوقتي لاسنان بس الله اعلم هترجع لبشري امتي
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
48- بالنسبة لمحافظات التامين الصحي الشامل بورسعيد - الاسماعيلية - الاقصر
لو انت اساسي فيهم مش انتداب يبقي انت كده مش هتقدم في الترشيح الوزاري ، انت هتاخد موافقة الهيئة و تروح تقدم في الجامعة مباشرة ، بس تكون الجامعة فاتحة طبعا
دي الخطوات بالنسبة للناس اللي تكليفها اساسي تبع التأمين الشامل هيئة الرعاية الصحية مش انتداااب هااا
49- لو انت تكليف تأمين شامل الاقصر او بورسعيد او الاسماعيلية فانت ملكش ترشيح من الوزارة اصلا ، انت هتاخد ورقة موافقة جهة العمل من الاقصر و توديها الجامعة و مش هتعدي علي الوزارة اصلا
50- لما تروح تاخد موافقة جهة العمل ابقي خد معاك صورة من نتيجة النيابات الصفحة اللي فيها اسمك و قولهم انا عايز اعمل موافقة جهة العمل للتقديم علي الماجستير ، هتقدم طلب صيغته عنده هو عارفها و هيرفع الطلب لمدير الفرع و بعد كده هتاخد منهم ورقة موجهة للجامعة و موضح فيها التخصص اللي انت هتقدم فيه ابقي راجع البيانات دي كلها
51- خد بالك بقي علشان لما تاخد منهم ورقة موافقة جهة العمل دي وارد يكتبلك فيها "بشرط عدم التفرغ"و الكلمة دي ممكن بعض الجامعات تعترض عليها فحاول ميكتبهاش و قوله انك كده كده مش علي قوة الهيئة علشان تأثر علي حسن سير العمل انت هتبقي اخليت اصلا
52- قبل ما تمشي من هناك ابقي خد معاك صورة مختومة من قرار تكليفك بالهيئة اللي هو اول صفحتين و الصفحة اللي فيها اسمك و لو عرفت تجيب بيان حالة وظيفية يبقي كويس
يبقي كده انت معاك
- ورقة موافقة جهة العمل - صورة من قرار تكليفك - بيان حالة وظيفية
53- طيب ورقة موافقة جهة العمل دي تفرق ايه عن الترشيح الوزاري
بالنسبة للقبول في الجامعة مش هتفرق حاجة لان كده كده كل جامعة ليها شروطها في التقدير و الاسكور و كده
بس الفرق بقي انك لو هم رجعوا سنة التفرغ في الصحة مش عارف هل التأمين هيرجعها و لا لا
54- الحاجة التانية ان لو حبيت تعمل انتداب للدراسة في الجامعة او الجامعة بتطلب حضور اجباري هل التأمين هيوافق و لا لا
بس فيه نقطة انك لو عدلت تكليفك من التأمين للصحة هل برضو مش هتعرف تاخد المميزات دي
بص مفروض اه مينفعش لانك مش متسجل في الوزارة اصلا ترشيح وزاري و لا يعرفوا عنك حاجة ، بس هنبقي نشوف بقي الفترة الجاية هيتعاملوا ازاي مع الناس اللي راجعة من التأمين بما ان التأمين فتحوا تعديل التكليف خلاص هل هيرضوا يدوهم تفرغ و انتداب الدراسة و لا لا
55- لو انت تكليف تأمين شامل جنوب سيناء اللي حصل اخر حركة انهم عملوا ترشيح عادي من المديرية هناك و تروح بيه الوزارة بس ده كان من ست شهور ، مش عارف دلوقتي هيمشوها كده و لا هيعملوا زي الاقصر و بورسعيد
عموما انت معاك فوق خطوات المديرية و لسه قايلك خطوات التأمين فشوف هيمشوها ازاي
56- لو انت تكليف اسوان او السويس غالبا هيعملوا ترشيح وزاري عادي كالمعتاد زي كل سنة لان لسه التأمين متطبقش بالكامل هناك هيبقي بنفس الخطوات اللي فوق خالص
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بالنسبة للدكتوراة :
هي نفس الشروط و نفس الخطوات بس هوضح كام حاجة كده
57- اللي من حقه يقدم
- اللي شغالين في المستشفيات (العلاجي) :
الترشيح ينفع بعد الحصول علي الماجستير و مش شرط يكون اترقي
- اللي شغالين في الرعاية الاساسية او اي قطاع تاني:
الترشيح بعد سنة من الحصول علي الماجستير
هتعمل نفس خطوت التقديم
تقديم علي الموقع ثم تقديم ورقي بالمديرية - ادارة التدريب
58- بالنسبة للتقديم علي الموقع :
- خانة القطاع و الادارة : علي حسب انت علي قوة مستشفي و لا لا زي ما وضحت في رقم 22
- خانة دراسات سابقة : هتكتب الماجستير اللي انت اخذته
- خانة الشهادات هترفع شهادة الماجستير
59- بالنسبة للتقديم الورقي :
- لازم يكون معاك شهادة الماجستير مش هينفع افادة و لا شهادة مؤقتة
- فيه ورقة اسمها موافقة جهة العمل هتقدم طلب لوكيل الوزارة مدير المديرية يعني ، و لو انت اساسي في الامانة هتقدمه لرئيس الامانة
السيد مدير.....
تحية طيبة و بعد ؛
ارجو من سيادتكم التكرم بالموافقة علي تقدمي للترشيح الوزاري لدرجة الدكتوراة تخصص ...... للعام الدراسي 2023/2024
ولسيادتكم جزيل الشكر
مقدمه لسيادتكم
الاسم
الوظيفة
و يتمضي و يتختم
60- بعد كده زي الماستر برضو هتستني ظهور النتيجة و تتابع مع الجامعة
طبعا فيه بعض الجامعات او بعض الاقسام داخل بعض الجامعات بتحتاج موافقتهم هم الاول بس دي حاجة تخصهم هم في الجامعة انما انت في الوزارة بتقدم عادي علشان التقديم بيبقي متاح الشهر ده بس و ممكن متعرفش تقدم بعد كده الا السنة الجاية
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
61- مواعيد فتح اغلب الجامعات للتسجيل حسب اخر تحديث ابريل 2023
- القصر بيفتح مرتين في يوليو / يناير
- عين شمس بتفتح مرتين في اغسطس / ديسمبر
- الازهر بنين و بنات القاهرة في اغسطس ، انما دمياط في يوليو ، اسيوط زي القاهرة (كلهم بيفتحوا مرة واحدة)
- حلوان بتفتح مرتين في (يوليو + اغسطس) / يناير
- الاسكندرية بتفتح مرتين في يوليو و ممكن يناير او فبراير و ده بيبقي احيانا لنواب الجامعة بس و احيانا لا
- المنصورة اتغيرت مواعيدها بقت بتفتح مرتين في يوليو / ديسمبر
- المنوفية بتفتح مرتين في يوليو / يناير
- بنها بتفتح مرة واحدة في (يوليو + اغسطس)
- طنطا اتغيرت مواعيدها بقت تفتح مرتين في (يوليو + اغسطس) / يناير
- الزقازيق بتفتح مرتين في اغسطس و في فبراير ده بيبقي احيانا لنواب الجامعة بس و احيانا الكل عادي
الزقازيق ساعات بيطلبوا بيان حالة وظيفية انك مستلم نيابة بقالك ست شهور
اسألوا هناك تاني علي الموضوع ده قبل ما تقدموا
- قناة السويس بتفتح مرتين في اغسطس او سبتمبر / مارس
- بورسعيد بتفتح مرتين في اغسطس و احيانا في مارس (السنتين اللي فاتت منزلتش في نتيجة الترشيح الوزاري)
- السويس لسه فاتحه جديد السنة دي 2023 فتحت في مارس مش عارف هينفع الوزارة تبعت عليها ترشيح وزاري و لا لا
- بني سويف بتفتح مرتين في اكتوبر / مارس
- اسيوط بتفتح مرتين في اكتوبر / مارس او ابريل
- سوهاج بتفتح مرتين في اكتوبر / مارس او ابريل
- جنوب الوادي بتفتح مرتين في اكتوبر / مارس او ابريل
شرح طريقة التسجيل للترشيح الوزاري للأطباء 2023
Reviewed by Der Arzt
on
12:20 م
Rating:
Reviewed by Der Arzt
on
12:20 م
Rating:
0 التعليقات
